fbpx
corona information

गृहपृष्ठ ५२ प्रतिशत संक्रमित निको भएर घर फर्किए

५२ प्रतिशत संक्रमित निको भएर घर फर्किए

काभ्रेलाञ्चोकको कूल कोरोना संक्रमितमध्ये हालसम्म ५२ प्रतिशतले कोरोनालाई जितेका छन् । जिल्लामा गत असार २ गतेयताका ३७९ संक्रमितमध्ये ५२ प्रतिशत अर्थात् १९६ कोरोना संक्रमणमुक्त भएका हुन् ।

हालसम्म २३४ पुरुष र १४४ महिलामा संक्रमण देखिएको थियो । यसमध्ये १२१ पुरुष र ७५ महिलाले कोरोनालाई जितेको कोभिड- १९ रोकथाम तथा नियन्त्रण कमाण्ड पोष्टले जनाएको छ । कोरोना संक्रमित एक पुरुष र एक महिलाको मृत्यु भएको छ । ‘जिल्लाका कूल संक्रमितमध्ये ५२ प्रतिशत निको भएर घर फर्किएका छन्, हामी कोरोना संक्रमणलाई नियन्त्रण गर्दै संक्रमितको उपचारमा दत्तचित्त छौँ,’ पोष्टका सदस्यसचिव एवं जिल्ला स्वास्थ्य कार्यालय प्रमुख डा. नरेन्द्र झाले भने ।

झाका अनुसार जिल्लामा कोरोना जित्नेमा बालबालिकादेखि वृद्धवृद्धासम्म छन् । जिल्लामा हाल सक्रिय संक्रमितको संख्या १८२ छ । संक्रमितमध्ये १४२ अस्पताल आइसोलेसन र ४० होम आइसोलेसनमा रहेको पोष्टले जनाएको छ । होम आइसोलेसनमा बस्नेलाई नियमित स्वास्थ्य जाँच तथा उपचार सेवा पुर्‍याइरहेको झाले बताए ।

काभ्रेपलाञ्चोकको सात स्थानीय तह हाल कोरोनामुक्त छन् । एक नगर तथा छ गाउँपालिका कोरोनामुक्त अवस्थामा रहेका हुन् । जिल्लाको १३ स्थानीय तहमध्ये मण्डन देउपुर नगरपालिका तथा रोशी, बेथानचोक, तेमाल, महाभारत, खानीखोला र चौँरीदेउराली गाउँपालिका कोरोनामुक्त भएका हुन् ।

जिल्लाकै कुल सक्रिय संक्रमितमध्ये सबैभन्दा बढी ५१ दशमलव ०९ प्रतिशत संक्रमित बनेपा नगरमा छन् । बनेपाका संक्रमितमध्ये महिलाको तुलनामा पुरुषको संख्या दोब्बर छ । सबैभन्दा कम नमोबुद्ध नगर र भुम्लु गाउँपालिकमा दुई/दुई रहेका छन् । पोष्टका अनुसार हाल सक्रिय संक्रमितमध्ये बनेपामा ९३, धुलिखेल नगरमा ५०, पनौतीमा चार र पाँचखालमा १० छन् ।

नयाँ संक्रमित देखिएलगत्तै ‘कन्ट्याक्ट ट्रेसिङ’ गर्ने र स्वाब संकलन गरी रिपोर्ट नआउञ्जेल क्वारेन्टिनमा राख्ने गरिएको झाले बताए । उनले भने, ‘संक्रमितको सम्पर्कमा आएकाहरु स्वतःस्फूर्त पिसीआर परीक्षणको दायरामा आए कोरोना संक्रमण नियन्त्रणमा निकै सहज हुने थियो ।’ उनका अनुसार कन्ट्याक्ट ट्रेसिङमा जनप्रतिनिधिको भूमिका निकै उत्साहपूर्ण देखिएको छ । जिल्लास्थित १३ स्थानीय तहमा हाल ९०३ शय्याको क्वारेन्टिन तथा २०९ शय्याको आइसोलेसन व्यवस्थित गरिएको छ । (रासस)

प्रकाशित समय ११:०८ बजे

vayodha-hospital

प्रतिक्रिया दिनुहोस्

सम्बन्धित शीर्षकहरु