ग्लोकल प्रालिले सञ्चालन गरेको ग्लोकल आफ्टर स्कुलले दुई दिने अनलाइन लर्निङ भर्चुअल कन्फ्रेन्स आयोजना गर्ने भएको छ । असार १४ र १५ गते आयोजना गर्न लागिएको कन्फ्रेन्सको शिक्षामन्त्री गिरिराजमणि पोखरेलले उद्घाटन गर्नेछन् ।

इलर्निङ सिकाइ सम्मेलनले यो क्षेत्रका अग्रणी विद्वान, शिक्षाविद् र अनुसन्धानकर्ताहरूलाई एकसाथ ल्याएर अनलाइन शिक्षण, शिक्षाको भविष्य र शिक्षाको सिद्धान्तमा विकास गर्न साझा मञ्च प्रदान गर्नेछ ।

ग्लोकल आफ्टर स्कुलले विभिन्न विषयमा अनलाइन पाठ्यक्रम सुरु गरेको छ । यी अनलाइन पाठ्यक्रम विभिन्न क्षेत्रका विज्ञहरूले आधारभूत शिक्षा तथा सीप प्रदान गरी अहिलेको समयको उचित सदुपयोगका लागि बनाइएको हो ।

सम्मेलनको मुख्य लक्ष्य अनलाइन लर्निङका सम्भावनालाई सम्बोधन गर्नु रहेको ग्लोकलले जनाएको छ । सम्मेलनमा अदामस युनिभर्सिटी, खान एकेडेमी, १० मिनेट स्कुल, फ्युज क्लासरुम, ग्लोकल आफ्टर स्कुल, टिच फर नेपाल, काठमाडौं विश्वविद्यालय, किङ्स कलेज, कारखाना एवं सिटिइभिटी जस्ता शिक्षण मञ्चहरुको सहभागिता रहनेछ ।

सम्मेलनमा कर्पोरेट्स, नीति निर्माता, विद्यार्थी, विश्वविद्यालय र पत्रकारहरू एवं शिक्षाविदहरु पनि उपस्थित हुनेछन् । ग्लोकल प्रालिका कार्यकारी निर्देशक आशीष ठाकुर सम्मेलनको माध्यमबाट शिक्षण संयन्त्रहरुको आविष्कार, अनुप्रयोग र समाधानहरूका लागि योगदान दिन र अनलाइन सिकाइ संयन्त्रमा प्रभावकारिता ल्याउन के गर्न सकिन्छ भन्नेबारे विकास गर्न चाहने बताए ।

प्रकाशित समय १३:११ बजे