विश्वभर महामारीको रुपमा फैलिएको कोरोना भाइरस (कोभिड-१९) का कारण ज्यान गुमाउनेको संख्या ९५ हजार नाघेको छ । त्यस्तै भाइरसको संक्रमण १६ लाख भन्दा बढी व्यक्तिमा देखिएको छ ।

चीनको बुहानबाट फैलन सुरु भएको भाइरस विश्वका सबै देशहरूमा फैलिएकाे भाइरसले ज्यान गुमाउनेको संख्या तीव्र गतिमा बढी रहेको छ । प्रत्येक दिन ज्यान गुमाउनेको संख्या हजार नाघ्दै आएको छ । त्यस्तै ५० हजारको संख्यामा दिनहुँजसो नयाँ संक्रमित फेला पर्दै आएका छन् ।

विश्व स्वास्थ्य संगठनको तथ्यांकअनुसार अहिलेसम्म १६ लाख तीन हजार ४३३ जनामा संक्रमण देखिएको छ । त्यस्तै ज्यान गुमाउनेको संख्या ९५ हजार ७१६ पुगेको छ । अहिले पनि ४९ हजार १२५ जनाको अवस्था गम्भीर रहेको छ ।

कोरोनाले निकै प्रकोप लिएका मुलुकको सूचीमा अमेरिका, स्पेन, इटाली, फ्रान्स, जर्मनी, इरान, युकेलगायत परेका छन् । ती देशहरूमा हजाराैंको संख्यामा ज्यान गइसकेको छ । अमेरिकामा मात्रै चार लाख ६८ हजार ५६६ जनामा संक्रमण देखिएको छ । त्यस्तै १६ हजार ६९१ जनाले ज्यान गुमाइसकेका छन् ।

सबैभन्दा बढी इटालीले आफ्ना नागरिक गुमाएको छ । अहिलेसम्म इटालीमा भाइरसका कारण ज्यान गुमाउनको संख्या १८ हजार २७९ पुगेको छ । त्यस्तै एक लाख ४३ हजार ६२६ जना  संक्रमित छन् । अहिलेसम्म तीन लाख ५६ हजार ४४० जनाको सफल उपचार भइसकेको संगठनले जनाएको छ ।

प्रकाशित समय ०७:०८ बजे