fbpx
Nepal Mediciti

गृहपृष्ठ सामुदायिक विद्यालयमा धानी नसक्नु चाप

सामुदायिक विद्यालयमा धानी नसक्नु चाप

रोल्पा सदरमुकाम लिबाङमा रहेको बालकल्याण नमुना माध्यमिक विद्यालयले बितेको एक दशकयता गरेको शैक्षिक सुधारसँगै अभिभावकको आकर्षण बढ्न थालेको छ । सरकारी विद्यालयको पठनपाठन राम्रो नहुने भन्दै निजीतर्फ आकर्षण बढिरहेको बेला रोल्पाको उक्त विद्यालय भने अभिभावकका लागि आकर्षणको केन्द्र बनेको हो ।

व्यवस्थापकीय परिवर्तन र प्रशासनिक सुधारपछि भने अहिले उक्त विद्यालय जिल्लाकै नमुना विद्यालयको रूपमा स्थापित भएको छ । शिक्षा विभागले ‘एक निर्वाचन क्षेत्र, एक नमुना विद्यालय’ को अवधारणाअनुसार रोल्पा जिल्लामा नमुना विद्यालयका रूपमा छनोट भएका दुई विद्यालयमध्ये यो विद्यालय एक हो । अभिभावक, विद्यालय व्यवस्थापन समिति र शिक्षकको लगातारको लगावका कारण विद्यालयको सुधार सम्भव भएको विद्यालय व्यवस्थापन समितिका अध्यक्ष महेश न्यौपानेले बताए । ‘अभिभावकको निरन्तर निगरानी, विद्यालय व्यवस्थापन समितिको खटनपटन एवं जिम्मेवारीबोध तथा शिक्षकमा आएको सेवा भावकै कारण विद्यालयको शैक्षिक सुधार सम्भव भएको हो,’ अध्यक्ष न्यौपानेले भने । विद्यालयमा आएको परिवर्तनसँगै निजी विद्यालय छाडेर यो विद्यालयमा अध्ययन गर्नेको भीड लागेको छ ।

शिक्षकमा कर्तव्यप्रतिको जिम्मेवारी, विद्यार्थीमा अनुशासन र पढ्नुपर्छ भन्ने भित्री अठोट एवं अभिभावकको निरन्तर सहयोग र निगरानीका कारण विद्यालयको शैक्षिक सुधार सम्भव भएको विद्यालयका प्राचार्य मधुसुदन पोखरेलले बताए । विद्यालयको समग्र अवस्था सन्तोष गर्ने स्थितिमा पुगे पनि अझै धेरै गर्न बाँकी रहेको पोखरेलले प्रतिक्रिया दिए । विद्यालय व्यवस्थापन समिति र विद्यालय प्रशासनको समीप सम्बन्ध र जिम्मेवारीप्रतिको बुझाइमा एकरूपता नहुँदासम्म विद्यालयको परिवर्तन असम्भव रहेको पोखरेलले अनुभूति व्यक्त गरे । बर्सेनि दुई-तीन सय विद्यार्थी निजी छाडेर आफ्नो विद्यालयमा आउने गरेको पोखरेलले जानकारी दिए ।

चालु शैक्षिक सत्रमा सो विद्यालयमा शिशु कक्षादेखि कक्षा १२ सम्म २ हजार ६६५ विद्यार्थी रहेको विद्यालयले जानकारी दिएको छ । विद्यालयले हाल शिशु कक्षादेखि कक्षा ९ सम्म अंग्रेजी माध्यमबाट पढाउँदै आएको छ । आगामी एक वर्षभित्र कक्षा १० सम्म नै अंग्रेजी माध्यमबाट पठनपाठन गराउने विद्यालयले जनाएको छ । शिशु कक्षादेखि कक्षा ५ सम्म अंग्रेजी माध्यम अनिवार्य बनाइएको छ भने कक्षा ६ देखि १० सम्म अंग्रेजी र नेपाली माध्यमका दुई धारमा पढाइ हुँदै आएको विद्यालयले जानकारी दिएको छ । ‘सोही विद्यालयमा अध्ययन गरेका तथा राम्रो निजी विद्यालयबाट आएकाका लागि अंग्रेजी माध्यम र अन्य विद्यालयबाट आएका विद्यार्थीका लागि नेपाली माध्यमको व्यवस्था गरेका छौँ,’ विद्यालयका प्राचार्य मधुसुदन पोखरेलले भने ।

दश जोड दुईमा विज्ञान, मानविकी, व्यवस्थापन, शिक्षा र कम्युटर विज्ञानको पढाइ भइरहेको विद्यालयले जानकारी दिएको छ । केही वर्षयता यस विद्यालयले प्राविधिक शिक्षा तथा व्यावसायिक तालिम परिषद्बाट सम्बन्धन प्राप्त गरी सब–इन्जिनियर र सब–ओभरसियर विषयमा समेत पठनपाठन गर्दै आएको छ ।

विद्यालयमा बढ्दै गएको विद्यार्थी संख्याको तुलनामा मानवीय र भौतिक संरचनाको व्यवस्थापनमा चुनौती थपिएको विद्यालय व्यवस्थापन समितिका सदस्य पवित्रा आचार्यले बताइन् । बर्सेनि ठुलो संख्यामा नयाँ विद्यार्थी थप हुँदै जाँदा शिक्षकको संख्या पनि थप्नुपर्ने र कक्षाकोठासमेत थप गर्नुपर्ने भएकाले विद्यालयलाई ठूलो व्ययभार हुँदै आएको आचार्यको भनाइ छ । कक्षा ६ देखि १० सम्म दुई भाषामा पठनपाठन गर्नुपर्दा दोब्बर जनशक्तिको व्यवस्थापन गर्नुपरेकाले थप व्ययभार हुँदै आएको उनको भनाइ छ । विद्यालयले अभिभावकलाई सन्तुष्टि दिन सके पनि यसको थप सुधारका लागि विद्यालय व्यवस्थपान समिति र विद्यालय प्रशासन गम्भीरताका साथ लागिपरेको उनले बताइनन् । (उमा केसी/रासस)

प्रकाशित समय १०:३१ बजे

vayodha-hospital
NCC Bank

प्रतिक्रिया दिनुहोस्

सम्बन्धित शीर्षकहरु