fbpx
corona information

गृहपृष्ठ भदौ १६ देखि सर्तसहित अन्तर्राष्ट्रिय उडान

भदौ १६ देखि सर्तसहित अन्तर्राष्ट्रिय उडान

tia

सरकारले लकडाउनको पाँच महिनापछि भदौ १६ गतेदेखि सशर्त नियमित अन्तर्राष्ट्रिय उडान सञ्चालन गर्ने भएको छ । कोभिड‑१९ महामारीबाट बचेर सुरक्षित उडानका लागि सरकारले पीसीआर परीक्षण सहज भएका देशबाट सर्तसहितको नियमित उडान गर्ने भएको हो ।

मन्त्रिपरिषद्को बिहीबार बसेको बैठकले भदौ १६ गतेदेखि सर्तसहित निश्चित आधारमा नियमित उडान सुरु गर्ने निर्णय लिएको सरकारका प्रवक्ता एवं सञ्चार तथा सूचना प्रविधिमन्त्री डा. युवराज खतिवडाले जानकारी दिए । मन्त्रिपरिषद्को निर्णय सार्वजनिक गर्न शुक्रबार मन्त्रालयमा आयोजित पत्रकार सम्मेलनमा मन्त्री खतिवडाले दैनिक ५०० यात्रु नकट्ने गरी उडान सञ्चालन गर्न दिने निर्णय भएको बताए ।

त्यसका लागि संस्कृति, पर्यटन तथा नागरिक उड्यन मन्त्रालयलाई उडान तालिका बनाउने जिम्मेवारी दिइएको छ । मन्त्रालयले निश्चित आधारमा उडान तालिका तयार गर्नेछ । मन्त्री खतिवडाका अनुसार पीसीआर परीक्षण सहज भएका मुलुकहरु मलेसिया, युएई, दक्षिण कोरिया, थाइल्यान्ड, जापान, चीन, हङकङ, अस्ट्रेलिया, अमेरिका, क्यानाडा र युरोपेली मुलुकबाट सरकारको निर्णयअनुसार नेपाल आउन अनुमति भएका नेपाली नागरिक र नेपालस्थित विदेशी नियोगका कूटनीतिज्ञ, कर्मचारी, संयुक्त राष्ट्रसंघका कर्मचारीलगायतलाई मात्र नेपाल ल्याउने गरी नियमति उडान गरिनेछ ।

बैठकले पीसीआिर सहज नभएका मुलुक कतार, साउदी अरब र कुवेतलगायत अन्य मुलुकबाट नियमित उडानमार्फत् यात्रु ल्याउन नपाइने निर्णय गरेको छ । नियमित उडानका लागि उडान अनुमति नभएका श्रमिक रहेका मुलुकबाट सम्बन्धित नेपाली कूटनीतिक नियोगबाट सिफारिस भएको नामावलीबमोजिमका यात्रुका लागि चार्टर्ड उडान गरेर ल्याउन सकिनेछ ।

यसरी आउने यात्रुको ७२ घण्टाभित्र पीसीआर टेस्ट गर्दा रिपोर्ट नेगेटिभ आएको हुनुपर्नेछ । विदेशबाट आउने यात्रु काठमाडौंमा आएपछि सात दिन आफ्नै खर्चमा होटल क्वारेन्टिनमा बस्नुपर्नेछ । पीसीआर परीक्षण गरेका र नगरेका यात्रु एउटै विमानमा आए सबैलाई क्वारेन्टिनमा राखिनेछ र त्यसको सबै खर्च एयरलाइन्सले व्यहोर्नुपर्नेछ ।

यस्तै पीसीआर टेस्ट सहज नभएका मुलुकहरुमा चार्टर फ्लाइटमात्र सञ्चालन  हुनेछ । पीसीआर परीक्षण भएका र नभएकालाई एकै उडानमा ल्याउँदा संक्रमण फैलिने जोखिम रहने भन्दै मन्त्री खतिवडाले ती मुलुकबाट स्वदेश आउन चाहने यात्रुको हकमा सम्बन्धित नेपाली कूटनीतिक नियोगको सिफारिसमा चार्टर्ड उडान गर्न सकिने बताए ।

विश्वव्यापी रुपमा फैलिएको कोभिड‑१९ महामारी संक्रमण नियन्त्रणका लागि सरकारले चैत ११ देखि साउन ६ गतेसम्म देशभर लकडाउन लागू गरेको थियो । तत्कालीन परिस्थितिमा संक्रमण दर कम भएको आंकलन गरी विज्ञहरुको सुझावमा सरकारले भदौ १ गतेदेखि आन्तरिक र अन्तर्राष्ट्रिय व्यावसायिक उडान सुरु गर्ने घोषणा गरेको थियो । तर, राजधानी काठमाडौँसहित देशभर कोभिड‑१९ का संक्रमित बढेपछि सरकारले पुनः भदौ १५ गतेसम्म व्यावसायिक उडान नखोल्ने निर्णय गरेको थियो ।

स्वास्थ्य तथा जनसंख्या मन्त्रालयको विवरणअनुसार हाल मुलुकभर कोभिड‑१९ संक्रमितको संख्या ३० हजार ४८३ पुगेको छ । पछिल्लो २४ घण्टामा ८३८ जना संक्रमण थपिएका छन् । व्यावसायिक उडान ठप्प हुँदा वायु सेवाप्रदायक कम्पनीलाई नराम्ररी असर परेको छ । यसले मुलुकको समग्र हवाई क्षेत्र थलिएको छ । त्रिभुवन अन्तर्राष्ट्रिय विमानस्थलमा अन्तर्राष्ट्रियतर्फ तीन नेपालीसहित ३० वायुसेवा कम्पनीले उडान भर्दै आएका छन् ।

प्रकाशित समय २१:३६ बजे

vayodha-hospital

प्रतिक्रिया दिनुहोस्

सम्बन्धित शीर्षकहरु