fbpx

गृहपृष्ठ पर्यटन प्रवर्द्धनका लागि आँधीखोलामा र्‍याफ्टिङ

पर्यटन प्रवर्द्धनका लागि आँधीखोलामा र्‍याफ्टिङ

सरकारले सन् २०२० लाई नेपाल पर्यटन वर्षका रूपमा मनाउने तयारी गरिरहेका बेला स्याङ्जाको वालिङका युवाहरूले पर्यटन प्रवर्द्धनका लागि आँधीखोलामा पत्रकारलाई समेत र्‍याफ्टिङ गराएका छन् । वन्डरफुल वालिङ संस्थामा आबद्ध युवाहरू संस्थामार्फत पर्यटन प्रवर्द्धनमा सक्रिय भएर लागेका छन् ।

नेपाल सरकारले पर्यटन वर्षका रूपमा मनाउनका लागि प्रचारप्रसारमा लागिरहेका बेला भ्रमण वर्षलाई सफल बनाउने उद्देश्यका साथ सरकारले मनाउन लागेको भ्रमण वर्षलाई सहयोग गर्न पर्यटनका क्षेत्रमा काम गर्ने योजनाका साथ अगाडि बढेका छन् ।

श्रवण कुमार र उनका मातापितासँग जोडिएको धार्मिक तथा ऐतिहासिक महत्व रहेको आँधीखोलामा शनिबार पत्रकारसहितको टोलीले करिब २५ किलोमिटरको र्‍याफ्टिङ यात्रा गरेको हो । धार्मिक तथा ऐतिहासिक महत्व रहेको आँधीखोलामा समेत र्‍याफ्टिङको सम्भावना रहेकाले यसको प्रचारप्रसारका लागि र्‍याफ्टिङको आयोजना गरेको वन्डरफुल वालिङका कार्यवाहक अध्यक्ष आशिषप्रताप खाँणले बताए ।

र्‍याफ्टिङ व्यवसायी तथा गाइडर सुभास थापाले बर्खाको मौसममा अन्य नदीहरूमा पानीको बहाव बढी हुने भएकाले र्‍याफ्टिङ गर्न नपाइने तर आँधीखोलामा बर्खाको समयमा पानीको बहावको मात्रा उपयुक्त हुने भएकाले बर्खाको तीन महिना साउनदेखि असोजसम्म सुरक्षित किसिमले र्‍याफ्टिङको मजा लिन सकिने बताए । पर्यटकीय नगरी पोखरा घुम्न आउने पर्यटकले आँधीखोलामा र्‍याफ्टिङको मज्जा लिन सक्ने थापा बताउँछन् । उनी भन्छन्न्छ, ‘पोखराको नजिकै रहेको आँधीखोलामा राम्रोसँग प्रचारप्रसार गरेको खण्डमा जलयात्राको प्रचुर सम्भावना रहेको यो ठाउँ पर्यटकको आर्कषण गन्तव्य बन्न सक्छ ।’

भीरकोट नगरपालिका–१ हेलुदेखि वालिङ नगरपालिका–१३ बायेटारीसम्म करिब २५ किलोमिटरको जलयात्रालाई व्यवस्थित गर्न सके आँधीखोलामा र्‍याफ्टिङका माध्यमबाट रोजगारीका साथै आन्तरिक एवं बाह्य पर्यटकका माध्यमबाट राम्रो आम्दानी लिन सकिने वन्डरफुल वालिङका सचिव गणेश राउतले बताए । (रासस)

प्रकाशित समय ११:२१ बजे

vayodha-hospital
NCC Bank

प्रतिक्रिया दिनुहोस्

सम्बन्धित शीर्षकहरु