fbpx
Rashifal Ad
Nepal Mediciti

गृहपृष्ठ भ्रमण वर्षसँगै ‘अम्ब्रेला स्ट्रिट’ सञ्चालनमा आउने

भ्रमण वर्षसँगै ‘अम्ब्रेला स्ट्रिट’ सञ्चालनमा आउने

भरतपुर महानगरपालिका-२२ पटिहानीमा निर्माण भइरहेको ‘अम्ब्रेला स्ट्रिट विथ सनसेट भ्यु भ्रमण वर्ष २०२०’ सँगै सञ्चालनमा आउने भएको छ । एक वर्षअघिबाट थालिएको काम अन्तिम चरणमा पुगेको छ ।

चितवन राष्ट्रिय निकुञ्ज भएर बगेको राप्ती नदीको किनारमा रहेको रमणीय स्थलमा वन, वन्यजन्तु र सूर्यास्तको अवलोकनसँगै थारू समुदायको संस्कृतिसँग रमाउनका लागि स्ट्रिट निर्माण गरिएको हो ।

उक्त स्थानमा छातामुनि बसेर विभिन्न स्थानीय परिकारमा पर्यटक रमाउन पाउनेछन् । भरतपुर महानगरपालिका-२२ का वडाध्यक्ष विष्णुराज महतोका अनुसार मुख्य एउटा र सहायक दुईवटा पानीका फोहोरा जडान गर्न बाँकी छ ।

यसैगरी छाता र त्यसमाथि रहने फाइबरको छानाका लागि बोलपत्र आह्वान भइसकेको छ । ती कामबाहेक अन्य काम अन्तिम अवस्थामा पुगेको उनले बताए । सो ठाउँको राप्तीतर्फ ३५ मिटर लम्बाइ र १८ मिटर चौडाइका तलमाथि गरी दुईवटा खण्ड रहेका छन् । त्यसको भुँइमा पोख्रेली ढुंगा छापिएको छ ।

सोही ठाउँमा राखिने कुर्चीमा बसेर पर्यटकले निकुञ्जको दृश्यावलोकनमा रमाउँदै एकसिंगे गैँडासहितका दुलर्भ वन्यजन्तु हेर्न सक्नेछन् । यससँगै बाटोसँग जोडिएको ९० मिटर लामो र १२ मिटर चौडाइ रहेको ठाउँमा कंक्रिट टायल बिछ्याइएको छ । उक्त ठाउँमा ३४० वटा छाता र त्यसमुनि कुर्ची टेबुल रहनेछन् । त्यसमाथि फाइबरको छाना रहनेछ ।

महतोका अनुसार ९० मिटर लामो भागमा चार स्थानमा टापु बनाइएको छ भने बीच भागबाट १६ वटा फलामका बिजुलीका पोल गाडिएको छ । त्यस माथिको खुला तारको सट्टामा प्लास्टिक बेरिएको तार राखिएको छ । प्रवेशद्वारमा चौकीदार कक्ष, टिकट कक्ष र शौचालय निर्माण गरिएको छ ।

सोही स्थानमा १० वटा फ्रेममा थारूका संस्कृति झल्कने वस्तु राखिएका छन् । काम सम्पन्न गर्न ४ करोड ५० लाख रूपैयाँ खर्च हुने अनुमान गरिएको महतोले बताए । सो कामका लागि संस्कृति, पर्यटन तथा नागरिक उड्डयन मन्त्रालयले १ करोड रूपैयाँ निकासा गरिसकेको छ । थप रकमको आश्वासनसमेत रहेको भन्दै उनले अपुग रकम महानगरपालिका र वडा कार्यालयले जुटाउने बताए ।

यही डिसेम्बरसम्ममा काम सम्पन्न गरी स्ट्रिट सञ्चालनमा ल्याउन लागिएको उनले जानकारी दिए । यो क्षेत्र गत वर्ष सरकारले घोषणा गरेका १०० पर्यटकीय गन्तव्यमध्येको एक हो ।

क्षेत्रीय होटल संघ पश्चिम चितवन कसरा एकाइका संयोजक गणेश पौडेलका अनुसार निकुञ्जको मुख्यालय नजिकै रहेको पटिहानी क्षेत्रमा ठूला होटलको संख्या बढ्दै गएको छ । जिल्लाको दोस्रो पर्यटकीय गन्तव्यका रूपमा यस क्षेत्रलाई चिनिँदै आएको छ । यस क्षेत्रमा ५० वटाभन्दा बढी साना ठूला होटल, रिसोर्ट सञ्चालनमा रहेको उनले बताए ।

विशेषगरी यस क्षेत्रमा पर्यटकले जिप सफारी, डुंगा सफारी, जंगल सफारी गर्न पाउनुका साथै घडियाल र गिद्ध प्रजनन केन्द्र अवलोकन गर्न सक्ने उनले बताए । यसै क्षेत्रमा थारू समुदायको बस्ती रहेको छ । (रासस)

प्रकाशित समय १५:४३ बजे

vayodha-hospital
NCC Bank

प्रतिक्रिया दिनुहोस्

सम्बन्धित शीर्षकहरु