fbpx
corona information

गृहपृष्ठ सेयर बजारको बुल यात्रा, ६० प्रतिशत उकालो लाग्यो नेप्से

सेयर बजारको बुल यात्रा, ६० प्रतिशत उकालो लाग्यो नेप्से

नेपालको सेयर बजार बुल यात्रा सुरु गरेको २० महिनाको अवधिमा ६० प्रतिशतले उकालो लागेको छ । २०७३ साउन १२ गते १८८१ अंकमा पुगेर बियरिस बनेको सेयर बजार २०७५ फागुन १९ गते त्यसपछिको न्यूनतम अंक ११००.५८ मा झरेको थियो । त्यसपछि बजारले बुल यात्रा सुरु गरेको हो । मंसिर ७ गते बजारले १८०० अंक पार गरिसकेको छ ।

कतिपय कम्पनी डेढ सय प्रतिशतभन्दा धेरैले बढिसकेका छन् । अंकित मूल्यनजिक र अंकित मूल्यभन्दा तल कारोबार भइरहेका अपी पावर, नेसनल हाइड्रोपावरलगायतका कम्पनी डेढ सय प्रतिशतले बढेका छन् । त्यस्तै विशाल बजार कम्पनी, साल्ट ट्रेडिङ कर्पोरेसन, हिमालयन डिस्टिलरी, बोटलर्स नेपाल (तराई)लगायतका कम्पनी केही दिनको अवधिमै शतप्रतिशतभन्दा धेरैले बढिसकेका छन् । छोटो अवधिमा मूल्य दोब्बर हुने कम्पनीको सूची लामै बनिसकेको छ ।

यो अवधिमा कुल बजार पुँजीकरण पनि उल्लेख्य बढेको छ । सेयर बजारमा रहेका सम्पूर्ण कम्पनीको कुल मूल्य नेप्से परिसूचक न्यून हुँदा १४ खर्ब ३५ अर्ब रुपैयाँसम्म झरेको थियो । सोमबार कुल बजार पुँजीकरणले २३ खर्ब ८६ अर्ब रुपैयाँ पार गरेको छ । यो वृद्धि करिब ६६ प्रतिशतभन्दा बढी हो । अहिले दैनिक ५-६ अर्बको सेयर किनबेच हुन थालेको छ भने आइतबार सर्वाधिक ६ अर्ब ९० करोडको कारोबार भयो ।

सेयर बजार विश्लेषकहरू बजार बुलिस ट्रेन्डमा गएपछि तीनदेखि पाँच वर्षसम्म रहने बताउँछन् । बुलको २० महिना पार भइसके पनि नयाँ विन्दु कायम नभएसम्म यात्रा नरोकिने रविन्द्र भट्टराई बताउँछन् । उनका अनुसार नेपालको सेयर बजार विभिन्न तीन कारणले उकालो लागिरहेको छ- न्यून ब्याजदर, प्राविधिक परिवर्तन र कोरोनाभाइरस । कोरोनाभाइरसका कारण लगानीका अन्य क्षेत्र संकुचित भइरहेका बेला न्यून ब्याजदरले बजार वृद्धिको गति बढाउन सहयोग पुगेको छ ।

त्यस्तै प्राविधिक परिवर्तन हरेक बुलिसका लागि मेरुदण्ड बन्ने गरेको छ । २०७२ सालमा मार्केट डेप्थ (बजारको गहिराइ) हेर्न मिल्ने व्यवस्थाले बजारलाई १८८१ अंकको यात्रा तय गराएको थियो । यसपटक अनलाइन कारोबार वृद्धिको कारक बनिरहेको छ । उच्च कारोबार मूल्यले पनि यो आधारलाई थप बलियो बनाएको छ ।

प्राविधिक सुधार हुने हो भने नेपालको सेयर बजारको दैनिक कारोबार क्षमता ५ अर्बभन्दा बढी भएको जानकारहरुले बताउँदै आएका थिए । धितोपत्र बोर्डका पूर्वअध्यक्ष रेवतबहादुर कार्कीले २०७५ कात्तिक २० गते काठमाडौँको होटल याक एन्ड यतिमा आयोजित अनलाइन कारोबार उद्घाटन कार्यक्रममै नेपालको सेयर बजारको दैनिक कारोबार क्षमता ५ अर्ब रूपैयाँभन्दा माथि भएको बताएका थिए । नेप्से बुलिस यात्रामा रहँदा कारोबार रकम एकैदिनमा ७ अर्बको हाराहारीमा पुग्न थालेको छ ।

यो पनि पढ्नुहोस्

सेयर बजार प्रवेश गर्न ‘गोल्डेन अवसर’

 

प्रकाशित समय १२:०४ बजे

प्रतिक्रिया दिनुहोस्

सम्बन्धित शीर्षकहरु