fbpx
corona information

गृहपृष्ठ साताभरमा नेप्से १०.७५ अंकले बढ्यो, साढे ११ अर्बको कारोबार

साताभरमा नेप्से १०.७५ अंकले बढ्यो, साढे ११ अर्बको कारोबार

साताभरमा नेपाल स्टक एक्सचेन्ज (नेप्से) परिसूचक १०.७५ अंकले बढेको छ । गत साताभरमा नेप्से ५२.३९ अंकले बढेको थियो ।

कारोबार रकममा खासै अन्तर छैन । गत साताभरमा चार दिनमात्रै कारोबार हुँदा करिब ११ अर्ब ७० करोड रुपैयाँको सेयर किनबेच भएकोमा यो साता ११ अर्ब ५२ करोड २४ लाख रुपैयाँको सेयर किनबेच भएको छ ।

कुन बार के भयो ?

इतबार

साताको पहिलो दिन आइतबार नेप्से १० अंकले घट्दा पाँच कम्पनीको मूल्यमा उछाल आयो । उन्नति सहकार्य लघुवित्त, अरुण भ्याली हाइड्रोपावर, जोशी हाइड्रोपावर, राधी विद्युत कम्पनी र युनिभर्सल पावर कम्पनीको सेयर मूल्य ९ प्रतिशतभन्दा धेरैले बढेको थियो ।

आइतबार नेप्से परिसूचक १०.४५ अंकले घट्यो । १९१ कम्पनीको ७० लाख ३८ हजार ९९० कित्ता सेयर २ अर्ब ७८ करोड २३ लाख रुपैयाँबराबरमा किनबेच भएको थियो । सबैभन्दा बढी नेपाल रिइन्स्योरेन्स कम्पनीको ४० करोड १३ लाख रुपैयाँको सेयर कारोबार भयो ।

त्यस्तै, नेपाल बैंक, नेको इन्स्योरेन्स, अरुण काबेली पावर, शिखर इन्स्योरेन्स, शिवम् सिमेन्ट, नागरिक लगानी कोष, नेपाल लाइफ इन्स्योरेन्स, हिमालयन डिस्टिलरी र एनआईसी एसिया सर्वाधिक कारोबार हुने १० कम्पनीको सूचीमा परे ।

सोमबार

दोस्रो दिन पनि सेयर बजार बढ्न सकेन । सोमबार नेप्से १२.१७ अंकले घट्यो । कुल १९२ कम्पनीको ५५ लाख ९५ हजार ५५१ कित्ता सेयर दुई अर्ब १६ करोड ४९ लाख रुपैयाँमा खरिद‑बिक्री भयो ।

कारोबारमा आधारमा नेपाल पुनर्बिमा कम्पनी २८ करोड ४० लाख रूपैयाँबराबरको कारोबारसहित शीर्ष स्थानमा रह्यो । यस्तै नागरिक लगानी कोषको १५ करोड ६३ लाख, नेको इन्स्योरेन्सको नौ करोड तीन लाख, एनएमबी बैंकको संस्थापक सेयर आठ करोड ८२ लाख, नेपाल लाइफ इन्स्योरेन्स कम्पनीको आठ करोड २४ लाख र शिवम् सिमेन्टको सात करोड ५४ लाख रुपैयाँबराबरको सेयर किनबेच भयो ।

सोमबार उन्नति सहकार्य लघुवित्त ९.९१, युनिभर्सल पावर कम्पनी ९.८७, जोशी हाइड्रोपावर ८.८६, नागरिक लगानी कोष ७.९४ र आशा लघुवित्त वित्तीय संस्थाका लगानीकर्ताले ७.३३ प्रतिशतले कमाए ।

मंगलबार

नेप्सेमा मंगलबार भने हरियाली छायो । मंगलबार नेप्से ७.३५ अंकले बढ्यो । बैंक र होटलबाहेकका सबै उपसमूह उकालो लागे ।

मंगलबार १९० कम्पनीको ४१ लाख ८० हजार ८१६ कित्ता सेयर १ अर्ब ७९ लाख ८३ हजार रुपैयाँमा किनबेच भयो । साल्ट ट्रेडिङ कर्पोरेसन, उन्नति सहकार्य लघुवित्त, एनआरएन लघुवित्त र जोशी हाइड्रोपावरको सेयर मूल्य करिब १० प्रतिशतले बढ्यो । चिलिमे हाइड्रोपावर, नागरिक लगानी कोष, मञ्जुश्री फाइनान्स, घोडीघोडा लघुवित्त, आशा लघुवित्त र रिलायन्स लाइफ इन्स्योरेन्स पनि सर्वाधिक मूल्य बढ्ने १० कम्पनीको सूचीमा परे ।

मंगलबार सर्वाधिक नेपाल रिइन्स्योरेन्स कम्पनीको २७ करोड ५५ लाख, नागरिक लगानी कोषको १२ करोड २२ लाख र नेको इन्स्योरेन्सको ९ करोढ ९१ लाख रुपैयाँको सेयर किनबेच भयो ।

बुधबार

नेप्सेको वृद्धिले बुधबार पनि निरन्तरता पायो । बैंक र विकास बैंकबाहेकका सबै समूह उकालो लागेपछि नेप्से १३.५ अंकले बढ्यो ।

बुधबार १९५ कम्पनीको ५८ लाख ३१ हजार ११० कित्ता सेयर २ अर्ब ५६ करोड ७३ लाख रुपैयाँबराबरमा किनबेच भयो । राष्ट्रिय बिमा कम्पनीको संस्थापक र सर्वसाधारण सेयर तथा रिलायन्स इन्स्योरेन्सको सेयर मूल्यमा सकारात्मक सर्किट लाग्यो । त्यस्तै आरम्भ चौतारी लघुवित्तको सेयर मूल्य पनि ९.३१ अंकले बढेको थियो । नेरुडे लघुवित्त, स्वरोजगार लघुवित्त, सिभिल लघुवित्त, सूर्य लाइफ इन्स्योरेन्स कम्पनी, एनआरएन लघुवित्त र कर्पोरेट डेभलपमेन्ट बैंक पनि सर्वाधिक मूल्य बढ्ने १० कम्पनीको सूचीमा परे ।

नेपाल रिइन्स्योरेन्स कम्पनी, नागरिक लगानी कोष, शिवम् सिमेन्ट, सूर्य लाइफ, नेको इन्स्योरेन्सलगायत कम्पनीको सबैभन्दा धेरै मूल्यको कारोबार भयो ।

बिहीबार

साताको अन्तिम दिन पनि नेप्से बढ्ने क्रमले निरन्तरता पायो । बिहीबार नेप्से १२.४९ अंकले बढ्दा चार कम्पनीको मूल्यमा उछाल आयो । राष्ट्रिय बिमा कम्पनीको संस्थापक तथा सर्वसाधारण सेयर, रिलायन्स लाइफ इन्स्योरेन्स, एनआरएन इन्फ्रास्ट्रक्चर एन्ड डेभलपमेन्ट र एनआरएन लघुवित्त वित्तीय संस्थाको सेयर मूल्य ९ प्रतिशतभन्दा धेरैले बढ्यो ।

बिहीबार कारोबार बन्द हुँदा नेप्सेको रेखाले १५२०.६९ अंक छोयो । कुल १८९ कम्पनीको ४३ लाख २९ हजार ६६५ कित्ता सेयर २ अर्ब २० करोड ९६ लाख रुपैयाँबराबरमा किनबेच भयो । बिहीबार पनि नेपाल रिइन्स्योरेन्स कम्पनीको सर्वाधिक १७ करोड ४२ लाख रुपैयाँबराबरको सेयर कारोबार भएको थियो ।

प्रकाशित समय १६:०० बजे

vayodha-hospital

प्रतिक्रिया दिनुहोस्

सम्बन्धित शीर्षकहरु