पाँच महिनामा बैँक तथा वित्तीय संस्थाका ३२१ शाखा थपिएका छन् । नेपाल राष्ट्र बैँकले बुधबार जारी गरेको तथ्यांकअनुसार २०७६ असार मसान्तसम्ममा देशभर बैँक तथा वित्तीय संस्थाका ९ हजार ७६५ शाखा रहेकोमा मंसिर मसान्तसम्ममा १० हजार ८६ पुगेको छ ।

समीक्षा अवधिमा वाणिज्य बैँकका मात्रै १४९ शाखा थपिएका छन् । त्यस्तै विकास बैँकका तीन, वित्त कम्पनीका १० र १५९ शाखा थपिएको राष्ट्र बैँकको तथ्यांकमा उल्लेख छ ।

मंसिरसम्ममा देशभर वाणिज्य बैँकका शाखा संख्या ४ हजार ५८५ पुगेका छन् । त्यस्तै लघुवित्तको शाखा संख्या ४ हजार २१६ पुगेको छ भने विकास बैँकको १ हजार ३२ र वित्त कम्पनीको शाखा संख्या २५३ छ ।

देशभर बैँक तथा वित्तीय संस्थाको संख्या भने पाँच महिनामा ११ वटा घटेका छन् । असारसम्म १५५ वटा बैँक तथा वित्तीय संस्था अस्तित्वमा रहेकोमा मंसिरसम्ममा मर्जर तथा एक्विजिसनमा गएर १४४ मा झरेको छ । हाल वाणिज्य बैँक संख्या २७, विकास बैँक संख्या १९, वित्त कम्पनी २१, लघुवित्त ७६ र एउटा पूर्वाधार विकास बैँक छ ।

चार स्थानीय तहमा बैँक पुग्न बाँकी

हालसम्म देशका चारवटा स्थानीय तहमा बैँकका शाखा खुल्न बाँकी छन् । प्रदेश १ का १३७ स्थानीय तहमध्ये १३६ वटामा बैँकका शाखा खुलेका छन् भने ताप्लेजुङको मिक्वाखोला गाउँपालिकामा शाखा खुलेको छैन । त्यस्तै बागमती प्रदेशका ११९ स्थानीय तहमध्ये धादिङको रूवी भ्याली गाउँपालिकामा बैँकको शाखा स्थापना भएको छैन ।

कर्णालीका ७९ स्थानीय तहमध्ये जाजरकोटको जुनीचाँदे गाउँपालिका र सुदूरपश्चिमका ८८ स्थानीय तहमध्ये बझाङको काँडा गाउँपालिकामा बैँक पुगेका छैनन् । प्रदेश २ का सबै १३६, गण्डकीका ८५ र लुम्बिनीका १०९ वटै शाखामा बैँक पुगिसकेका छन् ।

बैँक पुग्न बाँकी रहेका चार स्थानीय तहमा वित्तीय पूर्वाधार विकास गरी तत्काल शाखा खोल्ने प्रक्रिया अघि बढाइएको राष्ट्र बैँकले जनाएको छ । वित्तीय पूर्वाधारको अभावमा दुर्गम भेगमा पर्ने ती स्थानीय तहमा शाखा खोल्न नसकिएको हो ।

प्रकाशित समय २०:२३ बजे