fbpx
Dashain shuvakamana-long ad
corona information

गृहपृष्ठ बजार अनुगमनलाई वर्षैभरि निरन्तरता दिन माग

बजार अनुगमनलाई वर्षैभरि निरन्तरता दिन माग

बजार अनुगमनलाई चाडपर्वका बेला मात्र तीव्रता दिनुभन्दा वर्षैभरि निरन्तरता दिन नेपाल उद्योग वाणिज्य महासंघले सरकारसमक्ष माग गरेको छ । अनुगमनका क्रममा महासंघका सदस्य जिल्ला/नगर उद्योग वाणिज्य संघहरूलाई पनि एकसाथ लैजाने संरचना निर्माण गरी अनुगमन प्रणालीलाई विधिवत रूपमा अघि बढाउँदै सबै सरोकारवालाहरूको आत्मसम्मानको सुरक्षा गर्नसमेत महासंघको सुझाव छ ।

कोरोना महामारीको कठिन घडीमा कहींकतै कम गुणस्तरीय तथा उपभोग्य मिति गुज्रेका सामानको विक्रीवितरण, म्याद गुज्रेका वस्तुमा पुन: उपभोग्य मिति राखी बजारमा पठाइएको, निश्चित तौल नपुर्‍याई सामान बजारमा विक्री गरेको लगायतका प्रचलित कानुन विपरितका कार्यहरू भएको भन्ने गुनासाहरू आएकोतर्फ पनि महासंघले गम्भीर ध्यानाकर्षण भएको जनाएको छ ।

‘कहिल्यै र कहीँकतैबाट जनताको स्वास्थ्यसँग प्रत्यक्ष जोडिएका विषयमा लापरबाही हुनुहुँदैन । कसैलाई पनि जनताको प्रत्यक्ष स्वास्थ्यसँग खेलवाड हुने र प्रचलित कानुनविपरीत कार्य गर्ने छुट छैन । यदि कहीँकतैबाट भएको रहेछ भने कानुनअनुसार कारबाहीको भागिदार हुनुपर्ने हुँदा प्रचलित कानुन विपरितका कार्यमा संलग्न नहुन सम्बन्धित सबैमा आग्रह गर्दै सबै सदस्य जिल्ला/नगर उद्योग वाणिज्य संघहरू मार्फत मुलुकभरका उद्यमी व्यवसायीहरूमा व्यावसायिक आचारसंहिताको पूर्णपालना गरी व्यापार व्यवसाय गर्न आव्हान गर्दछौं,’ महासंघद्वारा जारी विज्ञप्तिमा उल्लेख छ ।

कोभिड- १९ महामारीका कारण मुलुकवासीको स्वास्थ्य सुरक्षा निकै पेचिलो बन्दै गएको र अर्थतन्त्रमा समेत गम्भीर असर परिरहेको महासंघले उल्लेख गरेको छ । निजी क्षेत्रले महामारीमा नेपाल सरकारलाई दरिलो साथ र सहयोग दिंदै आएको र अत्यावश्यक वस्तुहरूको आपूर्तिमा अहोरात्र खटिरहेको जनाउँदै महामारीमा मुलुकको आपूर्ति प्रणालीमा कुनै रोकावट आउन नदिन आफू र आफ्नो परिवारको समेत ज्यान जोखिममा राखेर अहोरात्र खटिरहेका सम्पूर्ण उद्यमी व्यवसायीहरूप्रति महासंघले आभार प्रकट गरेको छ ।

प्रकाशित समय १५:२८ बजे

vayodha-hospital

प्रतिक्रिया दिनुहोस्

सम्बन्धित शीर्षकहरु